ភ្នំពេញ៖ ប្រធានវេទិការសេដ្ឋកិច្ចពិភពលោក លោក Klaus Schwap បានកត់សម្គាល់ពីសក្កានុពលនៃយុវជនកម្ពុជាក្នុងសម័យបដិវត្តន៍ឧស្សាហកម្ម ៤.០ ដែលបានចាប់យកជំនាញបានល្អស្របតាមការវិវត្តន៍ថ្មីនេះ។ លោកថ្លែងបែបនេះក្នុងជំនួបជាមួយនាយករដ្ឋមន្ត្រីកម្ពុជាសម្ដេចតេជោ ហ៊ុន សែន កាលពីថ្ងៃទី១២ ខែវិច្ឆិកា ឆ្នាំ២០២២ ក្នុងឱកាសដែលលោកមកចូលរួមកិច្ចប្រជុំកំពូលអាស៊ាននៅប្រទេសកម្ពុជា។

ក្រៅពីកត់សម្គាល់ពីសក្ដានុពលនៃយុវជនកម្ពុជា លោកក៏បានវាយតម្លៃខ្ពស់ចំពោះការអភិវឌ្ឍប្រទេស និងភាពរីកចម្រើនយ៉ាងឆាប់រហ័សរបស់កម្ពុជាក្នុងពេលដែលពិភពលោកកំពុងប្រឈមនឹងសង្គ្រាមកម្ពុជា-អ៊ុយក្រែន និងបញ្ហាជាច្រើន។

កាលពីថ្ងៃទី១២ សម្ដេចតេជោ ហ៊ុន សែន ប្រធានអាស៊ានឆ្នាំ២០២២ ក៏បានជួបជាមួយអគ្គលេខាធិការនៃកិច្ចសហប្រតិបត្តិការសៀងហៃ លោក Zhang Ming ផងដែរ។

លោកអគ្គលេខាធិការ Zhang Ming បានអបអរសាទរចំពោះការដឹកនាំរបស់កម្ពុជា និងជោគជ័យនៃកិច្ចប្រជុំកំពូលអាស៊ានដែលកម្ពុជារៀបចំ។ ក្នុងពេលនោះដែរសម្ដេចតេជោបានអរគុណលោក Zhang Ming ដែលបានចូលរួមចែករំលែកក្នុងកិច្ចសន្ទនាសកលលើកទី២ ក្នុងកិច្ចប្រជុំកំពូលអាស៊ានផងដែរ។

កិច្ចប្រជុំកំពូលអាស៊ានប្រព្រឹត្តិទៅចាប់ពីថ្ងៃទី១០ រហូតដល់ថ្ងៃទី១៣ ខែវិច្ឆិកា ឆ្នាំ២០២២ ខណៈរសៀលថ្ងៃទី១៣ ខែវិច្ឆិកានេះ ក៏នឹងមានពិធីបិទដោយសម្ដេចតេជោ ប្រធានអាស៊ានឆ្នាំ២០២២ និងប្រគល់ញញួរប្រធានអាស៊ានឆ្នាំ២០២៣ ទៅលោកប្រធានាធិបតីឥណ្ឌូនេស៊ី លោក ចូកូវី ដូដូ ផងដែរ៕